WEIHNÅCHTN

Nua oamoi nu..

Nua oamo nu mechat i des Gfüh zruck, so wia fria, wia i kloa woa.

Wånn Weihnåchtn kemma is, mei, wia woa des schee!

So a Gfüh håb i nimma ghåbt, scho lång nimma!

Des woa so einwendi und tiaf wia a See.

Heit gibt`s des goa nimma, weu wåmma groß is, is`s oafåch weg, oafåch vaschwundn.

Dåmois håt ma jeden Tåg im Apfent gwoat, mit so oana Freid,

de kå ma goa ned beschreibn!

Mit so oana Hoffnung, wia`s heit koana mea kennt.

Wånn am Krånz die Kerzn håm brennt, ålle Wochn oane mehra,

dånn håt ma gwisst, boid is`s soweit!

De ållerschenste Zeit is då!

Und heit?

Ois is weg, ois dahi, so schåd, so schåd!

Wo is`n nua bliebn?

Gånz weng, nua a Futzal vo Åhnung, wia`s fria oamoi woar, di find i nu in mia.

Åba iagendwo muass do hi sei, des Gfüh?

Des kå do ned weg sei, håts wer gsegn oda goa troffn?

Vialleicht find´s jo wea und gibt ma`s goa zruck, mei, warat des schee!

Mei warat des schee!

Nua oamoi nu, mechat i des Gfüh håm...nua oamoi nu...

Edith

irgendwann vor Jahren geschrieben